Gezen ýagşydyr

Gezen ýagşydyr

Gulak goýsaň, bu sözüme, adamzat,

Dünýäde bir pasyl gezen ýagşydyr;

Kimge paýan berdi bu çarhy-naşat?

Çem gelen döwrany süren ýagşydyr.

Gyşyk beklär nukrasyna gaş tapsa,

Sygyr çölde gezer, doňuz mäş tasa,

Haýryny gözlemez betden iş tapsa,

Hemmesinden çölde jeren ýagşydyr.

Bende çeker, herne gelse uludan,

Habar sorsaň, jogap bolmaz ölüden.

Azgyrlyp kyçgyran nije weliden,

Azm urup, gaçarak duran ýagşydyr.

Özün besläp, garşy çykar talaba,

Nadan orun tapsa, azar galaba,

Özüni ötgeren loly-jelebe

Bir agyz söz diýmän duran ýagşydyr.

Keşt edip gezer men ilden-illere,

Däli köňlüm talwas eder güllere,

Kemine diýr, nesihatym dullara,

Tiziräk bir äre baran ýagşydyr.

Türkmen şahyry: Kemine کمینه