Halal gezer

Halal gezer

Dünýe bir bimesrep jaýdyr,

Haram gezer, halal gezer;

Mal eýesi pylan baýdyr,

Adam ornuna mal gezer.

Şerigaty bilseň dogry,

Aýtmasaň, boldugyň ogry,

Kazy egri, müfti egri,

Elip ornuna dal gezer.

Galypdyr kelamyň sözi,

Kör begenmez gören gözi,

Pir bolar şeýtanyň özi,

Sopular hem haýal gezer.

Sena bolmaz subhy-şamda,

Til – gybatda, gulak – tamda,

Kemine diýr, şu eýýamda

Sogap ornuna kal gezer.

Türkmen şahyry: Kemine کمینه