Çykdy-da gitdi
Eý, agalar, Ýolöteniň düzünden
Meniň sona boýlym çykdy-da gitdi;
Alma ýaňagyndan, ap-ak ýüzünden
Lagly-merjenleri dökdi-de gitdi.
Goş bilezik hup ýaraşar destinde,
Jellat gözler jan almanyň kastynda,
Aýjemalym akmaýanyň üstünde,
Bir keniz başyny çekdi-de gitdi.
Ýerden, gökden göterlipdir kararym,
Şana alyp, syýa zülpün daranym,
Aýjemalym, ap-ak ýüzli maralym
Gähin-gähin bärsin bakdy-da gitdi.
Jereni bar, owlagy bar çölüniň,
Ördegi bar, gazlary bar kölüniň,
Kemine diýr, sona boýly geliniň
Zarynlap gözýaşyn dökdi-de gitdi.
Türkmen şahyry: Kemine کمینه