Jana söwdügim

Jana söwdügim

Ogryn-ogryn gözleýişiň

Ot saldy jana, söwdügim.

Gara gözli, näzik beden,

Bir bak bu ýana, söwdügim!

Aý jemalyň şöhle salar,

Jellat gözüň janym alar,

Haçan senden mährim ganar?

Gitme daş ýana, söwdügim!

Gamzaň oky bermez aman,

Nurbat, aman, dur bir zaman,

Kirpigi ok, gaşy keman,

Dişi dürdäne söwdügim.

Keminäniň ýok çäresi,

Gözeliň bolmaz harasy,

Uzyn-gysganyň arasy,

Orta miýana söwdügim.

Türkmen şahyry: Kemine کمینه