Ärsarynyň gyzy

Ärsarynyň gyzy

Ýarym diýip, ýola çyksam,

Ýollar — ärsarynyň gyzy;

Jeren gözläp, çöle çyksam,

Çöller — ärsarynyň gyzy.

Çölüstanda bardyr baýlar,

Zyndan boldy maňa jaýlar,

Ötüp barýar ýyllar, aýlar,

Günler — ärsarynyň gyzy.

Alma-naryň ysy ýupar,

Ter mämeler goldan sypar,

Ýüzi görkli, eli çeper,

Çeper — ärsarynyň gyzy.

Ýerde ýatmaz ýazyň güli,

Saýraýyr bagyň bilbili,

Men islemen özge güli,

Güller — ärsarynyň gyzy.

Kemine bir dessan ýaýar,

Kimler dadar, kimler doýar,

Ýüregimde daglar goýar,

Çöller — ärsarynyň gyzy.

Türkmen şahyry: Kemine کمینه